گرفتارم به‌ نازی چاوه‌کانی مه‌ستی فه‌تتانت

بریندارم به‌ تیری سینه‌سۆزی نیشی موژگانت

به‌ زولف و په‌رچه‌م و ئه‌گریچه‌کانت غاره‌تت کردم

دڵێکم بوو ئه‌ویش خسته‌ ناو چاهی زه‌نه‌خدانت

جه‌نابا عاشقان ئه‌مڕۆ هه‌موو هاتوونه‌ پابۆست

منیش هاتم بفه‌رموو بمکوژن بمکه‌ن به‌ قوربانت

ته‌شه‌ککور واجبه‌ بۆ من ئه‌گه‌ر بمرم به‌ زه‌خمی تۆ

به‌ شه‌رتێ کفنه‌که‌م بدروێ به‌ تای اولفی په‌رێشانت

له‌ کوشتن گه‌ردنت ئازاد ده‌که‌م گه‌ر بێیته‌ سه‌ر قه‌برم

به‌ ڕۆژی جومعه‌ بمنێژن له‌ لای جه‌معی شه‌هیدانت

که‌سێ تۆ کوشتبێتت ڕۆژی قیامه‌ت زه‌حمه‌تی ناده‌ن

ئه‌گه‌ر وه‌ک من له‌ ئه‌م دنیایه‌ سووتابێ له‌ هیجرانت

هه‌میشه‌ سوجده‌گاهم خاکی به‌ر ده‌رگانه‌که‌ی تۆیه‌

ڕه‌قیب ڕووی ڕه‌ش بێ ناێیڵێ بگا ده‌ستم به‌ دامانت

له‌ شه‌رت و هه‌م وه‌فاداری خۆ تۆ مه‌شهووری ئافاقی

فیدای شه‌رت و وه‌فات بم، چی به‌سه‌ر هات مه‌یلی جارانت

ئه‌من ئه‌مڕۆ له‌ مڵکی عاشقی دا نادره‌ی ده‌هرم

به‌ ڕه‌سمی به‌نده‌گی عاشق هه‌موو هاتوونه‌ دیوانت

بڕۆ مه‌ستووره‌ شوکرێ که‌ له‌ ده‌رگای پادشای داوه‌ر

که‌ شۆڵه‌ی ڕۆژی ڕووی والی ده‌گاته‌ کۆشک و ئه‌یوانت-مه ستووره