♥♥ زاخه ♥♥

له‌ گیاندانا ده‌گوڕڕێنم : بژی هه‌ر کورد و کوردستان
به‌ گولله‌ی دوژمنانی گه‌ل دڵیشم بێته‌ ڕاوه‌ستان

پشووی دواییم ده‌خوێنم بۆ گوڵ و گوڵزاری ئه‌م خاکه‌
له‌ سایه‌ی ئه‌م گوڵ و گوڵزاره‌یه‌ بوومه‌ هه‌زارده‌ستان

ده‌زانن زامی دیلی چه‌ند به‌ ئێش و چه‌ند به‌ ئازاره‌ !
ده‌بێ ڕابێین هه‌تا ئێمه‌ش ده‌گه‌ینه‌ ڕێزی سه‌ربه‌ستان

خه‌تای خۆمانه‌ تا ئێستا، که‌ هه‌ر وا کۆیله‌ و دیلین
ئه‌وانه‌ی شاد و ئازادن که‌مێ زووتر له‌ خه‌و هه‌ستان

نه‌تاندیوه‌ که‌ ڕووباری خوڕێن به‌ردی ده‌قه‌ڵشێنێ
وه‌هاش هه‌ر زۆر و زۆرداری ده‌سووتێنێ گڕی هه‌ستان

له‌ مه‌یدانی شه‌ڕانخێوی خه‌باتی قه‌ڕنی بیسته‌مدا
سه‌رم سووڕما که‌ ئه‌سپی سووکه‌سواری کوردی بۆ وه‌ستان

وه‌ڵامی دامه‌وه‌ پیرێکی ئازاده‌ی جیهاندیده‌ :
خه‌تای سواران نه‌بوو، پێش سواره‌کانمان قورس و ناوه‌ستان

هه‌تا که‌نگێ سیاچاڵی به‌سامی دوژمنی زاڵم
پڕاوپڕ بێ له‌ ڕۆڵه‌ی گه‌ل، جمه‌ی بێ وا له‌ ده‌س به‌ستان

هه‌تا که‌ی ئه‌شکی خوێنینی کچه‌ کوردی برا کوژراو
له‌ جێی باده‌ و له‌ به‌زمی دوژمنان بدرێته‌ ده‌س مه‌ستان

مه‌ترسن رۆڵه‌کانی قاره‌مانی گه‌ل له‌ گیانبازی
له‌ کۆڕی ئه‌م خه‌باته‌ بی وچانه‌ تاقه‌ یه‌ک هه‌ستان

سه‌هۆڵبه‌ندانی بیدادی ئه‌گه‌رچی تووش و دژواره‌
به‌ڵام لێم سووره‌ وه‌ک ڕۆژێ، به‌هار هه‌ر دێ له‌ دووی زستان

به‌ خه‌ڵکی عاله‌می سه‌لماندووه‌ تاریخی ئازادی
ده‌بێ زاڵم له‌به‌ر تیکۆشه‌ران به‌رداته‌وه‌ ده‌ستان

1977-هیمن

+ نوشته شده در ساعت توسط لطیف |

یادگاری شیرن

چاوه‌که‌م! چاوی ڕه‌شی تۆ ئافه‌تی گیانی منه‌
گیانه‌که‌م! برژانگی تیژت نووکه‌ ڕمبی دوژمنه‌
شیری ده‌ستی شێری ئاڵایه‌ برۆ ڕاکشاوه‌که‌ت
جه‌رگی لاوێکی هه‌ژاری کوردی ورد پێ بنجنه‌

دیده‌که‌ی به‌خوماری تۆ، تورکانه‌ به‌دمه‌ستی ده‌کا
بۆیه‌ مه‌یلی وا به‌ کێشه‌ و فیتنه‌ و خوێن ڕشتنه‌
به‌ژنه‌که‌ت سێداره‌یه‌، که‌زیه‌ت ته‌نافه،‌ زووبه‌ ده‌ی!
بیخه‌ ئه‌ستۆی من که‌ کوردم، کورد به‌شی خنکاندنه‌

زامی جه‌رگی من به‌ فه‌رمووده‌ی گراوی سواری کورد
مه‌لهه‌می هه‌ر ژه‌نگی گواره‌ وئاره‌قی به‌رگه‌ردنه‌
ئاره‌زوومه‌ هیچ نه‌بێ جارێکی ماچ که‌م زاری تۆ
ئاره‌زووی من چووکه‌، ئه‌مما تا بفه‌مووی شیرنه‌

دڵ به‌ گرمه‌ی تۆپی گه‌وره‌ی دوژمنیش ڕانه‌چڵه‌کێ
داده‌خورپێ ئه‌م دڵه‌ ئه‌مما به‌ خرمه‌ی بازنه‌
خه‌ڵکی دنیا ڕازی دڵداری به‌ بێته‌ل پێک ده‌ڵێن
ڕاسپارده‌ی لاو و کیژی کورده‌ ئێستاکه‌ش شنه‌

ڕۆژی به‌ختی هه‌ر له‌ژێر هه‌ورێکی ڕه‌ش دا لاوی کورد
تاکوو ڕوخساری کچی شاری له‌ پێش چاوان ونه‌
نایه‌ڵێ گۆشه‌ی برۆکه‌ت ده‌رکه‌وێ چارشێوه‌که‌ت
ئه‌ی له‌ ده‌س ئه‌و چڵکه‌ هه‌وره‌ مانیعی مانگ گرتنه‌

چۆن ده‌بێ سه‌ربه‌ست، گه‌لی ژێرده‌ست، که‌ کچ دابه‌سته‌ بێ؟!
به‌س نه‌بێ ئه‌و کۆیله‌تی و ئه‌و کچ له‌ ژوور دابه‌ستنه!‌
ده‌رکی داخستوه‌ له‌ تۆ بابت که‌چی ده‌رکی نیه‌
ده‌رکه‌ داخستن له‌ تۆ ، ده‌رکی هومێد داخستنه‌

داڕزینه‌، مردنه‌، ئاخر هه‌تا که‌ی پێت بڵێن
نابێ بێته‌ده‌ر له‌ ماڵێ، مافی ژیانی کوا؟ ژنه‌
لاده‌ چارشێوی ڕه‌شت با ده‌رکه‌وێ کوڵمه‌ی گه‌شت
چون له‌ قه‌رنی بیسته‌ما زۆر عه‌یبه‌ ئه‌و ڕووگرتنه‌

کیژی خه‌ڵکی بۆمی ئاتۆمی دروست کرد و ئه‌تۆش
هه‌ر ده‌زانی ناوی(ئه‌ستێوڵک) و (ده‌رخۆنه‌) و (پنه‌)
فێری زانست و هونه‌ر بوو ئه‌و له‌ سایه‌ی خوێندنی
تۆش ته‌شیمان بۆ ده‌ڕێسی یادگاری شیرنه‌

ئه‌و به‌ ئاسمانا فڕی، دنیا گه‌ڕا، چوه‌ بن به‌حر
ده‌ک نه‌مێنم کاری ئێوه‌ش هه‌ر له‌ ژوور دانیشتنه‌
کوڕ به‌زێنه‌ ئه‌و له‌ عیلم و ئه‌و له‌ کار و سه‌نعه‌تا
گۆره‌ویشه‌ سه‌نعه‌تی تۆ، پێت خه‌نی بووم بیچنه‌!!

ئه‌و په‌چه‌ و ڕووبه‌ند و چارشێوه‌ی نه‌دیوه‌ نه‌نکی تۆ
ئه‌و شڕ و شاڵاته‌ دیاری دوژمنی دڵ چڵکنه‌
کیژی شێخ و کیژی حاجی و کیژی ئاغا ڕه‌نجه‌ڕۆن
کیژی ئازاده‌ ئه‌وی ژینی به‌ نووکی گاسنه‌

شه‌نگه‌بێری یار و ده‌سباری کوڕی کۆچه‌ر نه‌بێ
چۆن ده‌گاته‌ جێ هه‌وار و هۆبه‌ ئه‌و بارگه‌ و بنه‌؟
قه‌ڵشی ده‌ست و کوڵمی سووتاوی کچی لادێ نه‌بێ
چۆن ده‌گاته‌ ده‌ستی ده‌سبڕ ئه‌و هه‌موو تا تووتنه‌؟

نیسک و نۆک و ماشی ناو عه‌مباری ئاغای مفته‌خۆر
پاک له‌ سایه‌ی ده‌سکه‌نه‌ی(زین) و (مرۆت) و (سوێسنه‌)
شۆڕه‌ژن بنکۆڵ نه‌کا بڕکه‌ی به‌ قرچه‌ی نیوه‌ڕۆ
چۆن له‌ کاڵه‌ک تێر ده‌بێ ئه‌و زگ زله‌ بێستان ڕنه‌؟

کوا مه‌تاعی کورده‌واریمان ده‌چوو بۆ هه‌نده‌ران؟
گه‌ر به‌ سه‌ربه‌ستی نه‌ژیابا ئه‌و کچه‌ مازووچنه‌
بێر و هاوێری له‌ گه‌ڵ کاکی نه‌کردبا بن پشک
چۆن ده‌مانبوو ئه‌و هه‌موو گۆشت و په‌نیر و به‌رگنه‌ ؟

ده‌ست و که‌رکیتی کچی نازداری هه‌وشاری نه‌با
چۆن ده‌ڕازاوه‌ به‌ قاڵی شار و بازاڕی سنه‌ ؟ قالی = فه‌رش، مافوره‌
با هه‌زار(زێ) و (گاده‌ر) و (لاوێنی) ڕوونیشمان هه‌بێ
تاکوو ژن ئازاد نه‌بێ، سه‌رچاوه‌که‌ی ژین لیخنه‌

کۆیله‌تی باوی نه‌ماوه‌، کیژی کوردی خۆشه‌ویست!
ڕاپه‌ڕه‌، هه‌سته‌ له‌خه‌و، ئاخر چ وه‌ختی خه‌وتنه‌ ؟
ده‌رکه‌ بشکێنه‌، په‌چه‌ بدڕێنه‌، ڕاکه‌ مه‌دره‌سه‌
چاری ده‌ردی کورده‌واری خوێندنه‌، هه‌ر خوێندنه‌

دایکی زانایه‌ کوڕی ئازا ده‌نێرێته‌ خه‌بات
من گوتم تۆش تێبگه‌(ناگاته‌ ده‌ریایه‌ زنه‌)
گواره‌که‌ی زێڕت به‌کار نایه‌، له‌ گوێ بگره‌ قسه‌م
لایقی گوێی تۆ عه‌زیزم شیعری ساده‌ی (هێمنه‌)

مه‌هاباد ـ 1946-هیمن

+ نوشته شده در ساعت توسط لطیف |

کیژی لادێ

کیژی لادێ یی نه‌شمیلی جوان چاک
بێ فڕ و فێڵ و هێدی و داوێن پاک
ئه‌تۆ هه‌ر زگماگ وه‌ها جوانی
ته‌والێت چییه‌؟ ناوی نازانی
نیته‌ کراسی حه‌ریر و پۆپلین
گه‌وهه‌ری پێچرای له‌ ناو خامی شین
(پۆدر) و (کرێم) و ماتیکت نییه‌
هه‌ر نه‌ت بیستووه‌(ئۆدی کڵۆن) چییه‌؟
نه‌تکرد سووراو و سپیاو، چون دووری
له‌ شاری، که‌چی هه‌ر سپی و سووری
(فێڕ)ت لێ نه‌دا بسکه‌که‌ت لووله‌
ڕێژیمت نه‌گرت به‌ژنت وه‌ک تووله‌
لاجانگت وه‌کوو گزنگی تاوێ
هه‌ر بۆ خۆی جوانه‌ تیف تیفه‌ی ناوێ
کوڵمه‌که‌ت وه‌کوو گوڵاڵه‌ی گه‌شه‌
بێ سوورمه‌ش چاوه‌ مه‌سته‌که‌ت ڕه‌شه‌
وه‌کوو فرمێسکی ئاشق ڕووناکی
وه‌کوو ئاونگی به‌یانان پاکی
فێر نه‌بووی سیحر و گشته‌ک و نوشتوو
نه‌ جگه ‌گورگت هه‌یه و نه‌ موروو‌
مایه‌ی هومێدی کیژی چاو هه‌ڵۆ
نازانی مه‌کر و جامبازی و درۆ
چارشێوت نیه‌ ڕوو ناگری له‌ که‌س
نامووسی خۆته‌ پاسه‌وان و به‌س
به‌ تاسکه‌تاسک و به‌ له‌نجه‌ و لارت
به‌ به‌ژن و باڵای به‌رز و له‌بارت

به‌ دڵی ساده‌ و به‌ هه‌ستی پاکت
به‌ شه‌رم و حه‌یا و ئاکاری چاکت
منت کردوه‌ شێت و شه‌یدای خۆت
وه‌خته‌ له‌ سوێیان گیانم ده‌چێ بۆت
مه‌هاباد ـ 1946

+ نوشته شده در ساعت توسط لطیف |

تراویلکه‌

به‌ تینوایه‌تی خۆم ڕادێم :
ئه‌گه‌ر سه‌مای بریقه‌داری تراویلکه‌کان لێم گه‌ڕێن.

له‌ ته‌نیاییمدا ده‌پشکوێم :
ئه‌گه‌ر هه‌ناسه‌ی پاییزی ئه‌م ئاشنا نامۆیانه‌م
لێ دوور که‌وێ .

هه‌ر به‌یادی تۆوه‌ ده‌ژیم ئه‌ی ئازادی :
ئه‌گه‌ر یاده‌ تاڵه‌کانی ڕۆژانی نێو زیندانه‌کان
ده‌ست له‌ ئازارم هه‌ڵگرن !

1374 ی هه‌تاوی-مارف

+ نوشته شده در ساعت توسط لطیف |

به‌ سه‌ر ده‌ڕۆم

ساقی ! به‌ سه‌ر ده‌ڕۆم.
به‌سه‌ر شه‌پۆلی و شوعله‌دا، به‌سه‌ر ده‌ڕۆم .
خنکاوی ئاوی چاوی مه‌ستتم
به‌سه‌ر زه‌مانی کاتژمێری تاقه‌ دا
به‌ سه‌ر شه‌پۆلی پۆلی ته‌قڵه‌دا
به‌ سه‌ر هه‌ناسه‌ دا
هومێد و تاسه‌دا
شه‌راب و کاسه‌ دا
به‌ سه‌ر ده‌ڕۆم .
دڵبه‌ندی به‌ندی به‌ندتم
قه‌ڵغان و گولله‌ به‌ندتم
حه‌یرانی چۆن و چه‌ندتم
ڕێبواری ڕێ و ڕه‌وه‌ندتم
به‌ سه‌ر ده‌ڕۆم .
1362 ی هه‌تاوی-هه لو

+ نوشته شده در ساعت توسط لطیف |

زولفـــــــــــــــــــــــا.........

زولفا

کاتێ په‌نجه‌ی ڕه‌شی تاوان،
له سه‌ر پیتکه‌ی چه‌ك ترازا و
گلا ئاڵای باڵای زولفا!
یه‌که‌م که‌س دایک و باوکی بوون
درگایان خسته سه‌ر پشت و
چوونه سه‌ر جه‌سته‌ی نیوه‌گیان!
دایک له باوک،
باوک له دایک زیاتر
هه‌ردوو وه‌ک یه‌ک حه‌به‌سا بوون!
نه‌یان زانی
به‌کام ته‌قه‌ڵی هه‌نگاوه
گه‌یشتنه ئه‌و گۆمی خوێنه‌ی
رۆڵه جگه‌رگۆشه‌که‌یان
ئارام تێی‌دا ئۆقره‌ی گرت‌بوو!
له برینه‌کانی زولفاوه
وه‌ک پلووسکی کانی‌یه به‌ر ماڵان
خوێن هه‌ڵده‌چوو!
به‌ڵام هێشتا ڕه‌شێنکی چاوه گه‌شه‌که‌ی
ده‌ترووسکان!
له چاوی دایک و باوک‌دا
فرمێسکه‌کان قه‌تیس مابوون!
په‌نجه‌ی دایک
به‌حاسته‌م چوو،
چه‌پکه بسکی ئاڵۆزکاوی قژی زولفای
له‌سه‌ر روومه‌تی وه‌لادا!
ده‌سته زووره‌کانی باوک
خزانه سه‌ر گۆنای زه‌ردی و،
له پڕانێک
له قوڵپی گریانیان دا!
به‌ده‌م شیوه‌نی گه‌رمه‌وه
چاویان بڕیه چاوه‌کانی و
دابڕ دابڕ له‌بانگیان دا:
"کیژه جوانه‌که‌مان زولفا!
کێ وای لێ‌کردی بڵێ کێ؟"
لێوه ته‌نکه‌کانی زولفا
گوڵ‌هه‌ناری
تاوێک له‌مه‌وبه‌ر نه‌مابوون
ده‌تگوت په‌لکی گه‌زیزه‌ن و
به‌خۆره‌تاو ڕه‌ق هه‌ڵاتوون!
له‌ناو سۆزی شیوه‌نه‌وه
دیسان پرسیار:
"ئازیزه نه‌شمیلانه‌که زولفا!
کێ وای لێ‌کردی بڵێ کێ؟"
هه‌رچی کردی
ده‌نگ له‌گه‌رووی‌دا حه‌به‌سا!
به‌ڵام زولفا
به سه‌رنجی
به روانینی نیگای ده‌دوێ:
"بابه! بابه! هۆ بابه گیان!
مه‌پرسه لێم
که‌وه‌ڵامی ئه‌م پرسیاره
کوا به‌نیگا ده‌درێته‌وه؟
هۆبابه‌گیان! له‌سه‌ر یادی
له‌هه‌ڕه‌تی گڕوگاڵما
که‌ به‌گوڵینگه‌ی
ده‌سرازه‌ی بێشکه ژیرده‌بووم!
که له‌پشیله بۆر ده‌تۆرام
ئاشت ده‌بوومه‌وه
زویر ده‌بووم!
له‌سه‌ریادی
هۆ بابه‌گیان له‌سه‌ریادی
ئێواره‌یه‌ک،
چۆن گه‌نه‌شینکه‌ی چاوتۆپیو
ده‌چێته گوێی به‌رخۆله‌وه،
چۆن داڵاشی فێره که‌لاک
قرژ ده‌بێ له‌باڕۆکه،
چۆن گورگ و چه‌قه‌ڵ و رێوی
خۆ مه‌ڵاس‌ده‌ده‌ن بۆ نێچیر،
هۆبابه‌گیان! ئه‌و سه‌رده‌مه
ئه‌م کیژۆڵه برینداره‌ت
به‌رخۆله بوو،
باڕۆکه بوو،
نیچیرێکی به‌سته‌زمان بوو،
گه‌ر مه‌لای داڵ،
گه‌نه‌شینکه،
مه‌لای چه‌قه‌ڵ
هاته ‌ماڵمان و به‌شووی‌دام!
ئه‌رێ دایه!
هۆ دایه‌گیان!
ئه‌و کاته بۆ؟
وه‌ختێ ورته‌ورتی مه‌لا
کۆرپه‌ی له‌باوه‌ش ده‌ڕفاندی،
ڕات نه‌کرده مه‌ندیله‌که‌ی
بیکه‌یته داوه‌ڵی شڕی
مه‌ل تارێنی نێو دێبه‌رمان!"
هه‌ر هێنده‌ی سیگار کێشانێک
له گشت ماڵێکی نێودێ‌وه
ژن و پیاو و
کچ و کوڕانی ئاوایی
له خه‌ڵفی شووشی خوێناوی
ئه‌و ئازاره کۆ بوونه‌وه!
مناڵه قاچ تۆزاوی‌یه‌کان
جار و باره
نیگای وێڵیان
له‌سه‌ر فرمێسک و هه‌نیسکی دایکه‌کان و
ده‌سته‌خوشکه‌کانی زولفا ده‌نیشته‌وه،
جار و باره‌ش
له که‌لێنێکی ته‌سکه‌وه
گه‌لێ پرسیاری بێ‌ده‌نگیان
تێکه‌ڵ ئه‌و شینگایه ده‌کرد!
له ناو گه‌رمه‌ی شیوه‌نه‌وه
دیسان پرسیار،
پرسیار،
پرسیار!:
"کیژه جوانه‌که‌مان زولفا
کێ وای لێ‌کردی بڵێ کێ؟"
قوڕگی زولفا نیخه‌ی لێ‌دێ
به‌ڵام زولفا
به سه‌رنجی،
به ڕوانینی نیگای ده‌دوێ:
"بابه! بابه! هۆ بابه‌گیان!
له‌سه‌ر یادی هه‌موو ساڵێک
له‌دێبه‌ره‌که‌ی به‌رماڵمان
جێگای شه‌تڵمان خۆش‌ده‌کرد؟
به‌و نیشانه‌ی که پێت ده‌گوتم
ئه‌گه‌ر ئه‌مسال
تووتنه‌که‌مان باش ره‌نێو بێ،
به‌رجێژنانه،
کراسی شه‌رمینت بۆده‌کڕم!
ئه‌رێ له‌بیرته بابه‌گیان
چه‌ند بێزار بووی له گیاکه‌ڵه‌و
له‌کاڕووش و هه‌رچی بژاره!
چونکوو بژار
بێستانه‌که‌ی سیس ده‌کردین
چون گیا که‌ڵه
ده‌بووه مێمڵ له تووتن و
نه‌یده‌هێشت به‌رزه‌باڵابێ!
ئه‌رێ له‌بیرته بابه‌گیان
کاڕووش له‌کوێ‌با ده‌ت بینی،
بژار له‌کوێ با ده‌ژاکا!
ئه‌ی بۆ بابه؟
هۆ بابه گیان!
نه‌ک هه‌ر به سێ‌مانگی هاوین
ساڵ دوازده‌ی مانگ
هه‌موو ساڵێ به‌م رۆژگاره
ئه‌م کیژۆڵه‌ت
له‌ده‌س بژار
له‌ده‌س مڵه
باڵای نه‌ده‌کرد سیس ده‌بوو
تۆ نه‌ت ده‌دی؟
له‌کۆڕی ده‌سته‌خوشکان‌دا
ئه‌م بژاره‌مان ناو لێ‌نابوو
ده‌ردی ژن بوون!
به‌ڵێ بابه! هۆ بابه گیان!
ده‌ردی ژن بوون
هه‌موو ڕۆژێ
له‌ماڵه‌وه
له‌نێو دێ‌دا
وه‌ک بار ده‌نیشته سه‌ر لێوم
ده‌بوو به‌ته‌م له چاوم‌دا و
زه‌ردی ده‌کرد گۆنای سێوم
هه‌ر جاره‌ی ده‌سته‌خوشکێکم
به‌نابه‌دڵی به‌شوو درابێ،
له‌ڕۆژی به‌بووک چوونی‌دا
له‌ودیوی تارای سووره‌وه
ئاونگی ئه‌سرینم دیوه
ئه‌و ئه‌سرینه
وه‌کوو خه‌نجه‌ر
هه‌ستی ده‌روونمی ڕووشاندوه و
ئه‌م کیژۆڵه‌ت
دیسان دڵی ده‌کولایه‌وه!
هه‌ر جارێکی
له‌لای کچانی چیاوه
_ئه‌و کچانه‌ی
کۆڵوانه‌یان تووڕ هه‌ڵداوه و
به ره‌خت و چه‌ک
ڕازاوه‌ته‌وه باڵایان_
نامه‌ی ئه‌وینم بۆ‌هاتبێ،
ژیاومه‌ته‌وه
به‌ڵام کاتێ
نه‌م ده‌توانی بیخوێنمه‌وه
جارێکی تر
ده‌ردی ژن‌بوون
وه‌کوو برینێکی خوێ کردوو
زاری ئێشی ده‌کرایه‌وه!"
دیسان پرسیار
پرسیار
پرسیار!
"غونچه په‌ڕ په‌ڕه‌که‌م زولفا!
کێ وای لێ‌کردی بڵێ کێ؟"
ئه‌م جاره‌یان نیگای زولفا
وه‌ک فانۆسی دووکه‌ڵ گرتوو
وه‌کوو ده‌ڵقی تۆز لێ‌نیشتوو
وه‌ک کوانوه پشکۆی دامردوو
به ئاسته‌م ده‌ترووسکایه‌وه
به‌ڵام ئێستاش
هه‌ر به سه‌رنج
به‌ ڕوانینی نیگای ده‌دوێ:
"ئه‌ی پۆلی ده‌سته خوشکانم
ئه‌ی ئه‌وانه‌ی
ئێش و ژانی
دڵی ئه‌نجن ئه‌نجن بوومان
به‌گوێچکه‌ی یه‌کتر ئاشنایه
ئه‌م خوشکه‌تان
له وڵاتێک بووه قوربانی
که خۆشه‌ویستی تاوانه!
به‌ڵام وا ئێستا زولفاتان
به تاوانی خۆش‌نه‌ویستن
جێتان دێڵێ!
بنووسنه‌وه
بۆ کچانی شاخ بنووسن
ئه‌و تاوانباره‌ی زولفای کوشت
به‌سه‌ر پردێک‌دا په‌ڕیه‌وه
چێوبه‌سته‌که‌ی
له ده‌ردی ژن‌بوون ته‌نرابوو
لێ‌یان پرسن
ئه‌و پرده تاکه‌ی ناڕووخێ؟
تاکه‌ی ئه‌و پرده ناڕووخێ؟
زولفا ئیتر
دوا سه‌رنجی
به شوێن هیچ که‌سا ناگه‌ڕێ
به‌ڵام ئه‌م دوا نیگایه‌شی
بێده‌نگ نی‌یه و هه‌روا ده‌دوێ:
"ده‌نگ ده‌بیسم
ده‌نگی کاروان
ده‌نگی قافڵه‌ی خۆشه‌ویستی
سا ئه‌ی پۆلی ده‌سته‌خوشکان
مژده لێتان
کاول ده‌کرێن ئه‌و دڵانه‌ی
دنیا له‌به‌ر وان کاوله!"

ئه‌حمه‌د بازگر
خه‌نده‌کێ 28/9/67

+ نوشته شده در ساعت توسط لطیف |