♥♥ زاخه ♥♥

چوارخشته‌کییه‌کانی حه‌کیم عومه‌ری خه‌ییام

بۆ ژانی دڵان هه‌ر مه‌یه‌ ده‌رمانی بێ
زانا ئه‌وه‌یه‌ تامی له‌ مه‌ی زانی بێ
ئه‌و کۆنه‌ په‌ڕۆی لێوی له‌ مه‌ی پێ ده‌سڕن
به‌رماڵی هه‌زار سۆفی به‌ قوربانی بێ

کاتێ له‌ زه‌وی وه‌نه‌وشه‌ سه‌ر ده‌ردێنێ
سروه‌ ده‌می خونچه‌ ماچ بکا و ڕای ژێنێ
چه‌ند خۆشه‌ له‌ گه‌ڵ خونچه‌ ده‌مێ ڕای بوێری
تۆ تۆبه‌شکێن و ئه‌و دڵت نه‌شکێنێ

ئه‌و جوانه‌ که‌ خۆم ده‌ڵێم به‌ ته‌نیا جارێ
باوه‌ش به‌ یه‌کا بکه‌ین له‌ ده‌م ڕووبارێ
چیمه‌ن گوڵ و سه‌وزه‌پۆش و ئێمه‌ش سه‌رخۆش
پێم وابێ به‌هه‌شت وایه‌ ، به‌ڵام لێ بارێ

بۆم بان که‌نه‌ مه‌یگێڕێ که‌ : با مه‌ی بێنێ
پیری چله‌کێش باده‌یه‌ خۆی بنوێنێ
سه‌ر خۆشێ بناڵێنێ له‌ نیوه‌ی شه‌و دا
سه‌د نوێژی ڕیابازی مڕ و مۆچ دێنێ

شێخێ به‌ ژنی خراپی گوت: بێ شه‌رمی
بۆ هه‌رچی ده‌ست بۆ به‌رێ ساز و نه‌رمی
پێی گوت: به‌ڵێ من وه‌کوو دیارم هه‌ر وام
تۆش داخۆ وه‌کوو نیشان ده‌ده‌ی دڵگه‌رمی؟

مامۆستا هه‌ژار کردوویه‌ته‌ کوردی

+ نوشته شده در ساعت توسط لطیف |